Ian Marley
BIOGRAFIE
Ian Marley is ‘n senior dosent en vakhoof van die Grafiese Ontwerpvakgroep (tot en met 2009) in die Skool vir Kommunikasiestudies aan die Noordwes-Universiteit. Hy verwerf die volgende kwalifikasies by die Vaal University of Technology: N. Dip Beeldende Kunsgte, NH Dip Beeldende Kunste, and die M. Tech in Beeldende Kunste. Hy praktiseer ook as kunstenaar en het verskeie eenmantentoonstellings gehad en ook deelgeneem aan verskeie groepstentoonstellings op nasionale en internasionale vlak.
PROJEK
| Titel | fin. |
| Medium | Papier, perspex en katoen |
| Afmetings | 17 x 221 cm |
| Uitgawe | Uniek |
| Prys | R 10 000 |
Hierdie boek met die titel “fin.” bestaan uit 14 lasergegraveerde landskapfragmente wat in perspex omhul is en wat saamgestik is om sodoende deursigtige bladsye te vorm. Hierdie lasertegnologie brand en graveer letterlike die beelde van die landskap totdat slegs fragmente van die delikate katoenpapier (Farbriano) oorbly. Die gebrande beelde word in lae tussen perspex geplaas, asof oorblyfsels van ʼn histories-belangrike argiefdokument.
Konseptueel gesproke word die boek gekenmerk aan ʼn fassinasie met die landskap as ʼn brose en omvormbare entiteit in die mens se hande. Die werk wys hoe die landskap uitgelewer word aan die menslike aktiwiteite van oorwerk, ontwikkeling, uitputting, myne en uitbuiting – dit word ʼn landskap wat ʼn speelveld van aktiwiteite is en letsels oorbly as spore van menslike aggressie. Die proses van kneusing omvorm en muteer die landskap sodat dit stemloos word en ʼn dorsland van vernietiging oorbly. Soos mens deur die boek blaai beweeg jy al dieper die landskap van vernietiging binne totdat slegs die leë stilte oorbly.
BEELDMATERIAAL
EMAIL THIS ARTIST
